(ភ្នំពេញ)៖ ស្រីស្រស់សាច់សខ្ចី ដេននី ខ្វាន់ កន្លងមកធ្លាប់តែពើបប្រទះ នឹងរឿងរ៉ាវអាស្រូវផ្ទួនៗ បញ្ហារិះគន់មិនចេះចប់មិនចេះហើយ ជុំវិញការស្លៀកពាក់សិចស៊ី បង្ហាញសាច់ខ្ចី ថ្មីៗនេះនាងបានងាកមកផ្តើម ធ្វើការងារមនុស្ស ដើម្បីស្ដារកិត្តិយស និងមុខមាត់របស់ខ្លួនឡើងវិញ ដោយបានយកអំណោយ ជាថវិកា និងសម្ភារប្រើប្រាស់មួយចំនួន ចែកជូនដល់ជនក្រីក្រ ចាស់ជរាតាមបណ្ដាខេត្តឆ្ងាយៗ។
តាមរយៈរូបថតជាច្រើនសន្លឹក ដែលត្រូវបានម្ចាស់សាម៉ីខ្លួន តារាសម្តែងសិចស៊ី កញ្ញា ដេន នី បង្ហោះចែករំលែកនៅលើបណ្តាញទំនាក់ទំនង សង្គមហ្វេសប៊ុកនេះ បានបង្ហាញពី សកម្មភាព គ្រាដែលនាង និងក្រុមគ្រួសារ បាននាំយកអំណោយជាសម្ភារៈ និងថវិកាខ្លះៗ ទៅចែកជូនដល់បងប្អូន ប្រជាពលរដ្ឋក្រីក្រចាស់ជរា គ្មានទីពឹងចំនួន២៥នាក់ រស់នៅ ក្នុងទឹកដីខេត្តកំពង់ធំ។
ជាមួយការបង្ហោះរូបថតបង្ហាញ ពីសកម្មភាពមនុស្សធម៌ខាងលើនេះ នាង ដេន នី បានប្រាប់ឲ្យដឹងថា «នេះជាសកម្មភាព ចុះចែកអំណោយពីម្សិលមិញ ថ្ងៃចន្ទទី០១ខែកុម្ភៈ ឆ្នាំ២០១៦ ជូនដល់យាយតាជរា ដែលលំបាកនៅភូម ស្វាយម្ស៉ៅ ឃុំទ្រៀល ស្រុកបារាយណ៍ ខេត្តកំពង់ធំ ចំនួន២៥គ្រួសារ ។ នាងខ្ញុំពិតជាសប្បាយចិត្តខ្លាំងណាស់ ដែលបានជួយសម្រាលទុក្ខលំបាក ដល់ពួកគាត់បានមួយគ្រាដែរ ទោះជាអំណោយនេះ តិចតួចក្តីតែវាក៏ជាទឹកចិត្តរបស់នាងខ្ញុំផ្ទាល់ ដែលចង់ជួយដល់ពួកគាត់..»។
តារាស្រីដែលទើបទទួល បានតំណែងតួឯកលើកដំបូង កញ្ញា ដេននី ខ្វាន់ បានលើកឡើងទៀតថា «រាល់អំពើល្អដែលខ្ញុំបានធ្វើ គឺគ្មានអារម្មណ៍ថា ហត់នឿយឡើយ.. ហើយខ្ញុំនឹងបន្តធ្វើរហូត តាមលទ្ធភាពដែលអាចធ្វើបាន..»។ ជាមួយគ្នានេះ បើតាមការឲ្យដឹងបន្ថែមពីសំណាក់ កញ្ញា ដេននី បាននិយាយថា មិនមែនជាលើកទី១ សម្រាប់នាងនោះទេ ចំពោះសកម្មភាពមនុស្សធម៌លើនេះ គឺធ្លាប់មានជាបន្តបន្ទាប់ តាំងពីនាងមិនទាន់ចូលសិល្បៈមកម្ល៉េះ។
គួររំឭកថា តារាស្រីស្រស់សោភា នាង ដេននី ខ្វាន់ កន្លងមកធ្លាប់បានទទួលរងព្រនង់ នៃការរិះគន់ដោយសារតែភាពសិចស៊ី ហ៊ានបញ្ចេញសាច់ដើមទ្រូង ស្ទើរមើលឃើញទាំងស្រុងរបស់នាង។ ប៉ុន្តែក្រោយពីទទួលរងការរិះគន់ ថ្មីៗនេះនាងក៏បានងាកមកធ្វើសកម្មភាព មនុស្សធម៌តាមរយៈការផ្តល់សម្ភារ គ្រឿងបរិភោគ និងថវិកាជូនដល់ប្រជាពលរដ្ឋក្រីក្រ ដែលគេសង្ឃឹមថា ថ្ងៃក្រោយ នាងនឹងបន្តសកម្មភាព បែបនេះ ជាថ្មីបន្ថែមទៀត ៕
ផ្តល់សិទ្ធដោយ ៖ ហ្វ្រេសញូវអាស៊ី