CamNews

កាល​ពី​ថ្ងៃទី ០៣ ខែកុម្ភៈ ឆ្នាំ ២០១៧ ក្រុមហ៊ុនមេគង្គណិត បានឧបត្ថម្ភសេវាអ៊ីនធឺណិតដោយឥតគិតថ្លៃជូនដល់អង្គការ Passerelles numériques Cambodia​ (PNC)​ ដោយមានការចូលរួមជាកិត្ដិយសពី​លោកស្រី សុខ ចិន្ដា អគ្គនាយិកានៃក្រុមហ៊ុនមេគង្គណិត និងលោក John Munger ប្រធានអង្គការ PNC ប្រចាំព្រះរាជាណាចក្រកម្ពុជា ព្រមទាំងលោកគ្រូអ្នកគ្រូ បុគ្គលិកសិក្សា និងសិស្សានុសិស្សរបស់អង្គការ PNC ប្រមាណជាង ១០០ នាក់។

កម្មវិធីនេះ​ធ្វើ​ឡើង​ក្នុង​គោលបំណង ផ្តល់​ភាពងាយស្រួល ដល់បុគ្គលិក​ និងសិស្សានុសិស្សទាំងអស់នៅ​ក្នុង​អង្គការនេះ ដើម្បី​បំពេញការងារ និងការស្រាវជា្រវ​ឱ្យកាន់តែល្អប្រសើរ តាមរយៈការប្រើប្រាស់សេវាអ៊ីនធឺណិត​គុណភាពខ្ពស់របស់ក្រុមហ៊ុនមេគង្គណិត ។ ហើយម្យ៉ាងទៀត គឺដើម្បីចូលរួមជាផ្នែកមួយ ដល់សង្គម ក្នុងការលើកកម្ពស់វិស័យអប់រំនៅកម្ពុជា។

ថ្លែងនៅក្នុងឱកាសនោះ អ្នកស្រី សុខ ចិន្ដា អគ្គនាយិកានៃក្រុមហ៊ុនមេគង្គណិត បានមានប្រសាសន៍ថា លោកស្រីសូមកោតសរសើរ និងថ្លែងអំណរគុណ ចំពោះលោក John Munger ប្រធានអង្គការ ​PNC  ប្រចាំនៅព្រះរាជាណាចក្រកម្ពុជា  និងបុគ្គលិកទាំងអស់ ដែលតែងតែយកចិត្ដទុកដាក់ខ្ពស់ក្នុងកិច្ចកសាងធនធានមនុស្ស តាមរយៈការបង្កើតថ្នាលបណ្ដុះបណ្ដាល ដើម្បីឱ្យសិស្សានុសិស្សក្រីក្រតាមជនបទ និងសិស្សានុសិស្សមកពីបណ្ដាខេត្ដដាច់ស្រយាលទាំងអស់ បានក្រេប​ជញ្ជក់ចំណេះដឹង ដើម្បីជាទុនបម្រុងសម្រាប់ជីវិតទៅថ្ងៃអនាគត។ កិច្ចខិតខំប្រឹងប្រែង​នេះ គឺជាកិច្ចការសង្គមដ៏មានតម្លៃ និងមានអត្ថន័យ សម្រាប់ប្រជាជនខ្មែរ និងជាការចូលរួមចំណែក​ ជា​មួយរាជរដ្ឋាភិបាលកម្ពុជា ក្នុងការលើកកម្ពស់វិស័យអប់រំ ក៏ដូចជាកិច្ចកសាងធនធាន​មនុស្សនៅកម្ពុជា។

លោកស្រី មានប្រសាសន៍បន្ថែមថា ចំណេះដឹងគឺជាទុនដ៏មានតម្លៃមិនអាចខ្វះបាន ក្នុងការកសាងធនធានមនុស្សដើម្បីជាកម្លាំងចលករ ក្នុងកិច្ចអភិវឌ្ឍន៍សង្គមគ្រួសារ សង្គមជាតិ និងពិភពលោកទាំងមូលឱ្យមានការរីកចម្រើន នៅក្នុងវិថី​មួយដ៏ល្អប្រសើរ។ វិស័យអប់រំ គឺជាកត្ដាចំបងមិនអាចខ្វះបាន ក្នុងការកសាងសមត្ថភាពមនុស្ស​ជាតិ​ឱ្យរស់នៅប្រកបដោយភាពថ្លៃថ្នូរ ការគោរពគ្នា ការជួយគ្នាទៅវិញទៅមក ការគោរពសិទ្ធិមនុស្ស និងការកសាងសង្គមលោកឱ្យមានសន្ដិភាព។

គួរ​បញ្ជាក់​ផង​ដែរ​ថា ក្រុមហ៊ុនមេគង្គណេត បានឧបត្ថម្ភការប្រើប្រាស់សេវាអ៊ីនធឺណិតគ្មានដែនកំណត់ ដល់អង្គការសប្បុរសធម៌ PNC រយៈពេល ២ ឆ្នាំកន្លងមកហើយ ដែលមានល្បឿនដោនឡូត រហូតដល់ទៅ ៥ ម៉េហ្កាបៃត៍ ក្នុងមួយវិនាទី ដើម្បីអនុញ្ញាតឱ្យបុគ្គលិក និងសិស្សានុសិស្សទាំងអស់ អាចប្រើអ៊ីនធឺណិតល្បឿនលឿន សម្រាប់កិច្ចការសំខាន់ៗ និងការសិក្សា។

អំពីក្រុមហ៊ុន Mekongnet ISP

សូមជម្រាបជូនផងដែរថា MekongNet គឺជាក្រុមហ៊ុនផ្គត់ផ្គង់សេវាអ៊ីនធឺណិត (ISP) ឈានមុខ គេ នៅក្នុងប្រទេសកម្ពុជា ដែលបានក្លាយជាក្រុមហ៊ុនផ្គត់ផ្គង់សេវាអ៊ីនធឺណិត (ISP) គុណភាពខ្ពស់  និងមានផ្ដល់សេវាពេញលេញ ចាប់តាំងពីឆ្នាំ ២០០៦ រហូតមក​ ។ ជាមួយគ្នានេះដែរ ក្រុមហ៊ុននេះ បានទទួលអាជ្ញាប័ណ្ណ ជាក្រុមហ៊ុនផ្គត់ផ្គង់សេវាអ៊ីនធឺណិត (ISP) ក្រុមហ៊ុនផ្គត់ផ្គង់ការដោះដូរសេវាអ៊ីនធឺ​ណិត (IXP) និងជាមជ្ឈមណ្ឌលដោះដូរទិន្នន័យអ៊ីនធឺណិត (IDX) ពីក្រសួងប្រៃសណីយ៍ និងទូរគមនាគមន៍នៃប្រទេសកម្ពុជាផងដែរ៕

ព័ត៌មានបន្ថែមសូមទំនាក់ទំនង៖

• 093 22 25 00/ 023 22 66 22
• www.mekongnet.com.kh