(ភ្នំពេញ)៖ អតីតតារាចម្រៀងប្រុស របស់ផលិតកម្មសាន់ដេ នឹងបច្ចុប្បន្នបានផ្លាស់ផ្តូរទ្រនំ ហក់ចូលផលិតកម្មថោន លោក កែវ វាសនា ថ្មីៗនេះ ត្រូវបានប្រភពផ្លូវការពីរង្វង់សិល្បៈ ទម្លាយឲ្យដឹងពីសម្ព័ន្ធភាពស្នេហា រវាងលោក នឹងនារីវ័យក្មេងម្នាក់ ដែលគេស្គាល់ថា ជាថៅកែងហាងនៅក្រុងភ្នំពេញ ហើយជាកូនខ្មែរកាត់ចិន។
ប្រភពបាននិយាយថា តារាចម្រៀង កែវ វាសនា បានស្គាល់មានទំនាក់ទំនងស្នេហា ជាមួយនារីម្នាក់នេះជាច្រើនឆ្នាំមកហើយ តែដំណឹងនេះ មិនត្រូវបានបើកចំហឲ្យទស្សនិជន ដឹងជាសាធារណៈឡើយ ទើបកាលពីថ្មីៗនេះ គ្រាដែលនារីគូស្នេហ៍បើកសម្ពោធហាងថ្មីផ្ទាល់ខ្លួន គេសង្កេតឃើញតារាចម្រៀង កែវ វាសនា បានបង្ហាញមុខជាចំហ។ ពិធីនេះក៏បានអញ្ជើញ តារារួមអាជីពមួយចំនួន ចូលរួមជាភ្ញៀវផងដែរ ព្រោះជាការរៀបចំពីសំណាក់លោក កែវ វាសនា និងគូស្នេហ៍កូនកាត់ចិនវ័យក្មេង។
ទន្ទឹមគ្នានឹងការលើកឡើង ខាងលើនេះ នៅលើបណ្តាញសង្គមហ្វេសប៊ុក របស់តារាចម្រៀងធ្លាប់រួមរស់ក្នុងដំបូលផលិតកម្ម សាន់ដេ ដែលបានអញ្ជើញចូលរួមកម្មវិធី កញ្ញា អ៊ីវ៉ា ក៏បានសរសេរថា «ខ្ញុំនឹងប្រពន្ធកែវ វាសនា មួយណាស្អាតជាង ? អរគុណ ខ្លាំងណាស់ដែលបងស្នា នឹងប្រពន្ធគាត់ Chy Chy បានអញ្ជើញនាងខ្ញុំ ចូលរួមជាភ្ញៀវកិត្តិយស សូមជូនពរហាងរបស់គាត់ទាំងពីរ ឲ្យមានតែហេងៗៗៗ ហើយជូនពរស្នេហ៍ពួកគាត់ ទាំងពីរឲ្យនៅស្ថិតស្ថេរ ..អរគុណ! »។
តារាចម្រៀងចំណូលថ្មី របស់ផលិតកម្មថោន លោក កែវ វាសនា នៅព្រឹកថ្ងៃទី០៦ ខែមករា ឆ្នាំ២០១៦នេះ គេហទំព័រ Khmertalking ពុំទាន់ទទួលបានការឆ្លើយបំភ្លឺ តាមទូរស័ព្ទនៅឡើយទេជុំវិញរឿងនេះ។ ប៉ុន្តែបើក្រឡេកមើលនៅលើ Acount ហ្វេសប៊ុក ដែលប្រើឈ្មោះ Keo Veasna បានសរសេរដោយភ្ជាប់មក ជាមួយរូបថតនារីវ័យក្មេងនោះថា «My honey» ៕
ផ្តល់សិទ្ធដោយ ៖ ហ្វ្រេសញូវអាស៊ី