ភ្នំពេញៈ តារាសម្តែង និងជាតារាម៉ូដែល ជនជាតិថៃ មានឈ្មោះល្បី កញ្ញា Usamanee Vaithayanon (យូសាម៉ានី វ៉ៃថាយ៉ាកន) ហៅក្រៅថា kwan បន្ទាប់ពីនាង បានមកដល់ ប្រទេសកម្ពុជាភ្លាម នាងបានបង្ហាញពី អារម្មណ៍ផ្ទាល់ខ្លួនថា នាងពិតជាមានអារម្មណ៍ សប្បាយរីករាយ និងរំភើបចិត្ត ខ្លាំងណាស់ ដែលបានមកស្គាល់ ទឹកដីកម្ពុជា និងបានជួបអ្នកគាំទ្រ ជាលើកដំបូង ។
កញ្ញា Kwan គឺជាតារាមួយដួង ដែលទស្សនិកជនភាគច្រើន បានស្គាល់នាង តាមរយៈការសម្តែងរឿងនៅស្ថានីយទូរទស្សន៍ប៉ុស្តិ៍លេខ៧ ។ គ្រាន់តែចុះពីលើយន្តហោះ ជាន់ទឹកដីកម្ពុជាភ្លាម តារាស្រីរូបនេះ បានប្រញាប់ប្រញាល់ យកអំណោយទៅចែក ជូនកុមារកំព្រា នៅមណ្ឌល “កុមារកំព្រាសំរោង” ភ្លែតតែម្ដង ដោយអំណោយដែលនាង យកទៅចែកជូនកុមារ កំព្រានោះ មានសម្ភារៈសិក្សា រួមជាមួយថវិកាមួយចំនួនផងដែរ ។ នៅពេលរាត្រីតារាស្រី រូបនេះ ក៏បានបង្ហាញវត្តមាន ចូលរួមអបអរ ខួបគម្រប់១ឆ្នាំ របស់ក្លឹប RCA ដោយក្លឹបកម្សាន្តមួយនេះ បានរៀបចំកម្មវិធីសប្បាយ និងខនសឺតមួយសម្រាប់នាង ឡើងសម្តែង ជូនដល់អ្នកគាំទ្រ។
តារាស្រីថៃ រូបស្រស់ កញ្ញា Kwan បានប្រាប់ឲ្យដឹង ពីអារម្មណ៍ផ្ទាល់ខ្លួន ថា “ខ្ញុំពិតជាសប្បាយ ចិត្តខ្លាំងណាស់ ដែលបានមកដល់ប្រទេសកម្ពុជា ។ នេះជាលើកទី១ហើយ ដែលខ្ញុំមកទីនេះ ហើយបានចូលរួម កម្មវិធីសប្បាយៗ ជួបអ្នកគាំទ្រជាច្រើន ក្នុងក្លឹប RCA ខ្ញុំមិននឹកស្មានទេថា ខ្ញុំអាចបានជួបទស្សនិកជនច្រើន នៅទីនេះទេ .." ។
តារាថៃ មានសម្រស់ស្រស់ស្អាត ដូចកូនកាត់បារាំងរូបនេះ បានប្រាប់ឲ្យដឹង ពីចំណាប់អារម្មណ៍នាងទៀតថា នាងមកកម្ពុជានេះ គឺជាការ រៀបចំផ្ទាល់ របស់ថៅកែក្លឹប RCA ហើយនាង រំភើបចិត្តណាស់ ពេលបានសួរសុខទុក្ខ ដល់កុមារកំព្រា នៅមជ្ឈមណ្ឌលកុមារកំព្រា ។ "អ្វីដែលធ្វើឲ្យ ខ្ញុំមិននឹកស្មាន ដល់នោះ គឺនៅពេលរាត្រីមាន ភ្ញៀវជាច្រើន រង់ចាំការសម្តែង និងច្រៀងរបស់ខ្ញុំ នៅក្នុងបរិវេណក្លឹប RCA ដូច្នេះហើយខ្ញុំក៏ឆ្លៀត ក្នុងឱកាសនេះអរគុណ ដល់ថៅកែក្លឹប RCA ដែលបានរៀបចំ ខួបគម្រប់១ឆ្នាំ នៃការកកើត កន្លែងកម្សាន្តនេះ ហើយអញ្ជើញខ្ញុំ ឲ្យមកជួប ទស្សនិកជនកម្ពុជា ជាលើកទី១ ។ លើសពីនេះ ខ្ញុំបានជួបផ្ទាល់ តារាសម្តែងកម្ពុជា មួយចំនួនដែលមាន សម្រស់ស្អាតៗ ខ្លាំងណាស់" ។ នេះបើតាម នាង Kwan បានបញ្ជាក់បន្ថែម ។
នៅក្នុងនោះដែរ តារាស្រីរូបនេះ ក៏បានបង្ហើបឲ្យដឹង ពីអារម្មណ៍ផ្ទាល់ខ្លួនថា នាងចង់ស្ទង់មើលដែរថា អ្នកគាំទ្រនិងស្គាល់ នាងមានកម្រិតណា តែដល់ពេលជាក់ស្តែង គឺមានទស្សនិកជន ជាពិសេសយុវវ័យ គឺបានចូលរួមលើកទឹកចិត្ត និងស្គាល់នាងច្រើនហើយ នាងរំពឹងថា ឱកាសក្រោយ នាងអាចនឹង ត្រឡប់មកកម្ពុជាជាថ្មីម្តងទៀត នៅក្នុងពេលណាមួយ ជាក់ជាមិនខាន ។
បន្ទាប់ពីការសម្តែង របស់តារាស្រីនាង Kwan នៅពេលក្រោយ បន្ទាប់ពីកម្មវិធីនេះ ក្លឹប RCA ក៏មានត្រៀមរៀបចំ កម្មវិធីពិសេសៗ ដោយអញ្ជើញ តារាប្រុសស្រីល្បី ឈ្មោះ ដូចជា តារាកូរ៉េ ហ្វីលីពីន និងតារាមួយចំនួនទៀត មកសម្តែង នៅក្នុងក្លឹបកម្សាន្ត ដ៏ពេញនិយមមួយនេះ ជាបន្តបន្ទាប់ទៀត ដើម្បីបំពេញបំណង ទស្សនិកជន និងមិត្តៗយុវវ័យ ៕
ផ្តល់សិទ្ធដោយ ៖ ដើមអម្ពិល