CamNews

(ភ្នំពេញ)៖ តារាចម្រៀង និងសម្តែងកូនភ្លោះប្រុសពីរនាក់ លោក ស៊ិន សុភា និង ស៊ិន សុភ័ក្តិ ថ្មីៗ​នេះ​​ បានធ្វើឲ្យអ្នកនិយម លេងបណ្តាញសង្គម Facebook​មានការភ្ញាក់ផ្អើលគ្រប់​គ្នាព្រោះតែ ​តារា​ប្រុសពីរនាក់បងប្អូនភ្លោះ​រូប​នេះ បាន​ចេញមុខមកលាទត្រដាង ពីជម្លោះហែកហួរគ្នា ពីវិ​បត្តិ​ស្នេហាផ្ទាល់រវាងពួកគេទាំងពីរនាក់ ព្រោះតែស្រឡាញ់ស្រីម្នាក់ ​ដែ​លធ្វើ​​​ឲ្យពួកគេ មាន​កា​រ​​ឈឺចាប់ខ្លាំងស្ទើរ រកអ្វីប្រៀបផ្ទឹមគ្នាឡើយ។

តារាប្រុសទាំងពីរនាក់បងប្អូន លោក ស៊ិន សុភា និង ស៊ិន សុភ័ក្តិ ដែលធ្លាប់តែមានទឹកមុខញញឹម សប្បាយរីករាយមិនដែល​កើត​ទុក្ខ ពីមុនមក ស្រាប់តែពេលនេះ បែរជាសរសេរ​ ទម្លាយ​ប្រាប់​ពីរឿង​រ៉ាវ​ប្រវត្តិស្នេហ៍ ព្រមជាមួយនិងទឹកមុខដ៏ក្រៀមក្រំ នៅលើបណ្តាញទំនាក់ទំនង Facebook រួមជាមួយការរៀប​រាប់ ពីរឿង​រ៉ាវជីត​ស្នេហា​ ដែលពួកគេ បាន​ដាក់​ចិត្តស្រលាញ់នារីម្នាក់​ ស្រប​គ្នាក្នុងពេល​តែមួយ ពោលគឺមានចិត្តដូចគ្នា តែមួយមិនថាលើតែសម្ភារៈរបស់របរ ឬការស្រឡា​ញ់​ស្រីនោះទេ។

ឆ្លើយតបនឹងសាច់រឿងខាងលើ តារាកូនភ្លោះដែលកំពុងទាញបាន ប្រជាប្រិយភាពយ៉ាងច្រើនគួរសម ពីទស្សនិកជន លោក ស៊ិន សុភា និងស៊ិន សុភ័ក្តិ បានថ្លែងប្រាប់​Khmertalking តាមទូ​រស័​ព្ទថា «ជាការពិតបង ប៉ុន្តែនេះគ្រាន់តែជាអត្ថន័យ ក្នុងចម្រៀងរបស់ប៉ុណ្ណោះ។ ​ដូច្នេះសុំមហា​ជនកុំមានការយល់ច្រឡំ ព្រោះពុំមែនជាសាច់រឿងមែនទែន របស់ខ្ញុំទាំងពីរនាក់ បងប្អូននោះឡើយ»។

តារាកូនភ្លោះប្រុសពីរនាក់ លោក ស៊ិន សុភា និង ស៊ិន សុភ័ក្តិ បានបញ្ជាក់ថា នេះជាអត្ថន័យ​ នៅក្នុងបទចម្រៀងថ្មីរបស់លោក ដែលជាការច្រៀងរួមគ្នាមានចំណងជើងថា «សង្គ្រាមស្នេហ៍បងប្អូនភ្លោះ» គ្រោងត្រៀមចេញលក់ នៅលើទីផ្សារនាពេលឆាប់ៗខាងមុខនេះ។​ ម្យ៉ាងវាក៏ជា​បទ​ដំបូង របស់ពួកគ្រាដែល កំពុងក្លាយជាតារាចម្រៀង ប្រចាំផលិតកម្មថ្មីមានឈ្មោះថា 7Seven M​usic Production។ តាមរយៈបទនេះ កាលពីថ្មីៗនេះ តារាកូនភ្លោះបានយកទៅច្រៀង នៅ​លើត​ន្រ្តីស្ថានីយ ទូរទស្សន៍ប៉ុស្តិ៍CNC រហូតមានទស្សនជនច្រើន បានគាំទ្របទនេះយ៉ាងច្រើន៕