CamNews

ក្នុងរយះពេលប៉ុន្មានថ្ងៃកន្លងមកនេះ Samsung Galaxy Note 7 ដែលបានប្តូរថ្មី ត្រូវបានសារព័ត៌មាន​ល្បីៗ បន្តចុះផ្សាយជាបន្តបន្ទាប់ ពាក់ព័ន្ធនឹងបញ្ហាដែល វានៅតែបន្តផ្ទុះឆេះ។

ដំបូងគឺ Note7 ដែលបានប្តូរថ្មីមួយគ្រឿង បានផ្ទុះឆេះ នៅក្នុងយន្តហោះរបស់ Southwest Airlines នៅ​ពេលដែលការហោះហើរ ជិតនឹងចេញដំណើរទៅហើយនោះ។ ហើយថ្មីៗនេះ ក៏មានព័ត៌មានផ្សាយថា Note 7 ប្តូរថ្មីមួយគ្រឿងទៀត បានផ្ទុះឆេះនៅតៃវ៉ាន់។

កត្តានេះ បានធ្វើឲ្យអ្នកប្រើប្រាស់ពីមួយថ្ងៃទៅមួយថ្ងៃ កាន់តែមានការព្រួយបារម្ភ ហើយបណ្តាក្រុមហ៊ុន​ប្រព័ន្ធទូរស័ព្ទចល័តនៅអាមេរិច ក៏ភ័យបុកពោះពីរឿងនេះ មិនតិចដែរ។ ប្រព័ន្ធទូរស័ព្ទចល័តមួយចំនួន​នៅអាមេរិច បានអនុញ្ញាតឲ្យអតិថិជនខ្លួនប្តូរ Note 7 យកម៉ូដែលផ្សេង។ ក្នុងនោះ ប្រព័ន្ធទូរស័ព្ទចល័ត​ AT&T កំពុងតែពិចារណាលើផែនការ ឈប់ដាក់លក់ Note7 ជារៀងរហូតតែម្តង។

បន្ទាប់ស្ងប់ស្ងាត់មួយរយះពេលកន្លងមក Samsung បានចេញសេចក្តីថ្លែងការណ៍ជាផ្លូវការមួយ ជុំវិញ​បញ្ហាថ្មីៗដែលទើបតែកើតឡើងកន្លងមកនេះ។

+ ករណីដែលបានកើតឡើងនៅ Southwest Airlines, Samsung បានឲ្យដឹងថា:

ដោយសារតែមិនទាន់ទទួលបាននូវឧបករណ៍ដែលបានជួបបញ្ហា ដូច្នេះពួកខ្ញុំនៅមិនទាន់អាចធ្វើការ​កំណត់បញ្ជាក់បញ្ហានេះ ថាមានពាក់ព័ន្ធនឹង Note 7 ប្តូរថ្មីឬក៏អត់នោះទេ។ ពួកខ្ញុំកំពុងតែធ្វើការសហការ ជាមួយនឹងមន្ត្រីអាជ្ញាធរពាក់ព័ន្ធ និង Southwest Airlines ក្នុងគោលបំណងរកដំណោះស្រាយ និង​កំណត់បញ្ជាក់ពីមូលហេតនៃការផ្ទុះពិតប្រាកដ។ នៅពេលដែលពួកខ្ញុំបានធ្វើការត្រួតពិនិត្យឧបករណ៍ នោះពួកខ្ញុំនឹងមានព័ត៌មានបន្ថែមច្រើនជាងនេះ ចែករំលែក។

+ បន្ទាប់នោះ សេចក្តីថ្លែងការណ៍ជារួមមួយ ពាក់ព័ន្ធនឹងបញ្ហាដែលកំពុងជួបប្រទះ ក៏ត្រូវបាន Samsung ដាក់ចេញ​ភ្លាមដែរ :

Samsung យល់នូវការព្រួយបារម្ភ ដែលបណ្តាក្រុមហ៊ុនប្រព័ន្ធទូរស័ព្ទចល័ត និងអ្នកប្រើប្រាស់ កំពុងតែ​មាន បន្ទាប់ពីមានការលេចចេញនូវរបាយការណ៍ចុះផ្សាយជាច្រើន ដែលបានធ្វើឲ្យមានការសង្ស័យ ពាក់ព័ន្ធទៅនឹងគុណភាពរបស់ Note7 ដែលបានប្តូរថ្មីរបស់ពួកខ្ញុំ។ ពួកខ្ញុំកំពុងតែបន្តធ្វើការងារនេះ យ៉ាងឆាប់រហ័ស និងព្យាយាបបំផុត ដើម្បីត្រួតពិនិត្យបណ្តាករណីដែលត្រូវបានរាយការណ៍មក ដើម្បី​កំណត់បញ្ជាក់ និងចែករំលែកនូវមូលហេតុ កាន់តែឆាប់កាន់តែល្អ។

នៅក្នុងដំណាក់កាលនេះ ពួកខ្ញុំរក្សានូវទំនាក់ទំនងយ៉ាងជាប់លាប់ ជាមួយនឹងគណកម្មការសុវត្ថិភាព​ផលិតផលប្រើប្រាស់អាមេរិច (CPSC)។ បើសិនជាលេចចេញនូវបញ្ហា ពាក់ព័ន្ធនឹង Note7 ដែលបានប្តូរ​ថ្មី ពួកខ្ញុំនឹងសហការជាមួយនឹង CPSC ដើម្បីស្វែងរកវិធានការ ដោះស្រាយស្ថានការណ៍។ ពួកខ្ញុំចង់​បញ្ជាក់ថា ពួកខ្ញុំត្រួតពិនិត្យគ្រប់របាយការណ៍ទាំងអស់ យ៉ាងយកចិត្តទុកដាក់ជាទីបំផុត ហើយពួកខ្ញុំ​ឆ្លើយតបទៅលើការអត់ធ្មត់របស់ អ្នកទាំងអស់គ្នា ដោយការធ្វើការឧស្សាហ៍ព្យាយាមជាទីបំផុត"៕

- Galaxy Note 7 ថ្មីមួយគ្រឿងទៀតហើយ បានបន្តផ្ទុះឆេះ នៅតៃវ៉ាន់
- ក្រុមហ៊ុនប្រព័ន្ធទូរស័ព្ចល័តទនៅអាមេរិច រំលឹកដល់ការឈប់លក់ Note 7 ទាំងស្រុង បន្ទាប់ពីស្មាតហ្វូន​នេះ នៅតែមានផ្ទុះឆេះ

ប្រែសម្រួល៖ មង្គល
ប្រភព៖ PhoneArena, Genk