<p><strong>ភ្នំពេញ ៖</strong> ខ្សែភាពយន្តល្បីៗ ចំនួន ១២រឿង ដែលជាខ្សែភាពយន្ត តំណាងឲ្យសិល្បៈភាពយន្តទាំងមូល របស់ប្រទេសឥណ្ឌា នឹងធ្វើការដាក់បញ្ចាំង ជូនភ្ញៀវចូលរួមទស្សនា ដោយសេរី ចាប់ពីថ្ងៃទី១៥ ដល់ថ្ងៃទី២០ ខែសីហា ឆ្នាំ២០១៤ខាងមុននេះ នៅសាលមហោស្រពចតុមុខ រាជធានីភ្នំពេញ។</p>
<p>សន្និសីទសារព័ត៌មាន នៃកម្មវិធី "សប្តាហ៍ភាពយន្តឥណ្ឌា" នាព្រឹកថ្ងៃទី១១ ខែសីហា ឆ្នាំ២០១៤នេះ ដែលប្រារព្ធឡើងដោយ ស្ថានទូតឥណ្ឌា ប្រចាំនៅប្រទេសកម្ពុជា សហការជាមួយ មជ្ឈមណ្ឌលសោតទស្សន៍ បុផ្ផាណា និងមជ្ឈមណ្ឌលបណ្តុះបណ្តាលជំនាញ និងអាជីពថត ភាពយន្តនៅកម្ពុជា នាមជ្ឈមណ្ឌល សោតទស្សន៍បុប្ផាណា ។</p>
<p>លោក Dinesh K. Patnaik អគ្គរាជទូតឥណ្ឌា ប្រចាំនៅប្រទេសកម្ពុជា ដែលបានចូលរួមជា អធិបតីភាព នៅក្នុងកម្មវិធីសន្និសីទ សារព័ត៌មាននេះ បានថ្លែងឲ្យដឹងថា ឥណ្ឌាជាប្រទេសមួយ ផលិតករភាពយន្តច្រើនជាងគេបំផុត នៅលើពិភពលោក ដោយក្នុងមួយឆ្នាំ ផលិតបាន ១ ២៥០រឿង ច្រើនជាងក្រុមហ៊ុន Hollywood របស់សហរដ្ឋអាម៉េរិក ទៅទៀត។</p>
<p>ភាពយន្តឥណ្ឌា បានធ្វើការចាក់បញ្ចាំង នៅទូទាំងពិភពលោក ដោយនៅក្នុងប្រទេសកម្ពុជា កាលពីពេលកន្លងទៅ ភាពយន្តឥណ្ឌា ក៏ធ្លាប់មានប្រជាប្រិយភាពខ្លាំងផងដែរ ប៉ុន្តែមួយរយៈក្រោយនេះ ហាក់មានភាពស្ងប់ស្ងាត់ទៅវិញ ដោយសារមានទីផ្សារ ភាពយន្តច្រើន។</p>
<p>លោក Dinesh K. Patnaik បានបន្តថា "រដ្ឋាភិបាលឥណ្ឌា បាននាំយកខ្សែភាពយន្ត របស់ខ្លួន មកចាក់បញ្ចាំង នៅក្នុងសាលមហាស្រពកម្ពុជា ដើម្បីឲ្យភ្ញៀវទេសចរណ៍ ក៏ដូចជាប្រជាជនកម្ពុជា ទទួលបានការទស្សនា និងយល់ដឹងពីសិល្បៈភាពយន្ត ដ៏រីកចម្រើនរបស់ឥណ្ឌា ដោយការចូលរួមទស្សនា មិនត្រូវបានបង់ប្រាក់អ្វីនោះទេ"។</p>
<p>នេះជាមហោស្រពភាពយន្តឥណ្ឌាទី១ នៅទីក្រុងភ្នំពេញ ជាមួយនឹងរឿងចំនួន១២ ដែលវាតំណាងឲ្យភាពដ៏អស្ចារ្យមួយ ដើម្បីស្វែងយល់ និងប្រារព្ធខួប១០០ឆ្នាំ នៃភាពយន្ត Bollywood ឥណ្ឌា ដែលមានទាំងរឿងកំប្លែង ល្ខោន និងរឿងមនោសញ្ចេតនា។</p>
<p>ជាចុងក្រោយ លោកអគ្គរាជទូតឥណ្ឌា ប្រចាំនៅប្រទេសកម្ពុជា ក៏បានអំពាវនាវដល់ សាធារណៈជន ឲ្យធ្វើការចូលរួមទស្សនាខ្សែភាពយន្ត ដែលធ្វើការចាក់បញ្ចាំងនេះ ឲ្យបានច្រើនកុះករ ដើម្បីជាកម្លាំងចិត្ត ហើយប្រសិនបើមានការគាំទ្រច្រើននោះ រដ្ឋាភិបាលឥណ្ឌា នឹងធ្វើការដាក់បញ្ចាំង ឲ្យចូលរួមទស្សនា ជារៀងរាល់ឆ្នាំ៕</p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/August/id-065/PISETH-033.jpg" alt="" width="600" /></p>
<p style="text-align: center;"><img title=" " src="http://image.lookingtoday.com:81/lookingtoday/looking-images/news/2014/August/id-065/PISETH-030.jpg" alt="" width="600" /></p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/August/id-065/PISETH-031.jpg" alt="" width="600" /></p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/August/id-065/PISETH-032.jpg" alt="" width="600" /></p>
<p style="text-align: right;"><a href="http://lookingtoday.com/index.php/entertainment-general-news/33127-2014-08-11-06-55-59.html" target="_blank">ផ្តល់សិទ្ធដោយ ៖ ដើមអម្ពិល</a></p>