<p><span style="color: #000000;"><strong>(អេហ្ស៊ីប)៖</strong> គិតមដល់ថ្ងៃទី២៣ ខែឧសភានេះ ការរុករកជើងហោះហើរអេហ្ស៊ីប EgyptAir Flight 804 នៅតែបន្ត ខណៈដែលព័ត៌មានផ្សេងៗជាច្រើនត្រូវបានទម្លាយ ហើយព័ត៌មានចុងក្រោយបំផុតគឺ ក្រុមជំនាញផ្នែអាកាសចរណ៍របស់អេហ្ស៊ីប បានលើកឡើងថា យន្តហោះ EgyptAir MS804 មិនមែនធ្លាក់ដោយសារ ភេរវករវាយប្រហារនោះទេ ពីព្រោះគេអាចចាប់បានសំឡេងរបស់ពីឡុត ដែលព្យាយាមទាក់ទងមកកាន់ក្រុមត្រួតពិនិត្យផ្លូវអាកាសតែប៉ុន្មាននាទីប៉ុណ្ណោះ មុនយន្តហោះខាងលើនេះបាត់ដំណឹង។</span></p>
<p><span style="color: #000000;">មនុស្សគ្រប់គ្នាពិតជាចង់ដឹងខ្លាំងណាស់ថា យន្តហោះ EgyptAir បាត់ទៅទីណាឲ្យប្រាកដ ហើយលើសពីនេះ ក្រុមគ្រួសារអ្នកដំណើរនៅលើយន្តហោះ EgyptAir រឹតតែចង់ដឹងខ្លាំងជាងនេះទៅទៀត ដោយបច្ចុប្បន្នពួកគេកំពុងទន្ទឹងរង់ចាំដោយអន្ទះសារបំផុត ព្រោះគេខ្លាចយន្តហោះមួយគ្រឿងនេះ បាត់ដំណឹងដូច MH370។</span></p>
<p><span style="color: #000000;">អាជ្ញាធរអេហ្ស៊ីប ទើបបង្ហើបព័ត៌មានឲ្យដឹងនៅយប់ថ្ងៃអាទិត្យម្សិលមិញនេះថា ផ្នែកអាកាសចរណ៍ក្នុងស្រុកបានទាក់ទង និងបាននិយាយគ្នា ជាមួយពីឡុតលើយន្តហោះ EgyptAir MS804 ជាច្រើននាទីមុននឹងយន្តហោះបាត់ដំណឹង ដោយតាមការវិភាគសំឡេងរបស់ ពីឡុតនោះ គឺអគ្គិភ័យបានឆាបឆេះលើយន្តហោះ ដែលជាហេតុនាំឲ្យ ពីឡុតត្រូវចាត់វិធានការបន្ទាន់ដោយ ចេញការប្រកាសអាសន្ននៅក្នុងយន្តហោះ។</span></p>
<p><span style="color: #000000;">រឿងដែលហួសចិត្តមួយទៀតនោះគឺថា នារីបម្រើការងារលើយន្តហោះវ័យ ២៧ឆ្នាំឈ្មោះ Samar Ezz Eldin ដែលស្ថិតនៅលើយន្តហោះអេហ្ស៊ីប EgyptAir ធ្លាប់បានបង្ហោះរូបយន្តហោះធ្លាក់ចូល ក្នុងសមុទ្រ នៅលើ Facebook Account របស់នាងមុននឹងនាងចូលបម្រើការងារនេះជាផ្លូវការចំនួន ៤ខែ នៅក្នុងក្រុមហ៊ុន EgyptAir។</span></p>
<p><span style="color: #000000;">ក្រោយពីបាត់បានប៉ុន្មានថ្ងៃ The Wall Street Journa បានចុះផ្សាយថា ប្រព័ន្ធទំនាក់ទំនងដោយស្វ័យប្រវត្តិ នៅលើយន្តហោះ EgyptAir ជើងហោះហើរ Flight 804 បានផ្ញើសារព្រមាន ប៉ុន្មាននាទីមុនពេលយន្តហោះធ្លាក់ ដោយបានបង្ហាញថា ប្រព័ន្ធត្រួតពិនិត្យការហោះហើរត្រូវបានកាត់ផ្ដាច់ និងមានហ៊ុយផ្សែង។</span></p>
<p><span style="color: #000000;">នៅមុននេះក្រុមអ្នកវិភាគរបស់អាមេរិក បានលើកឡើងថា យន្តហោះ EgyptAir ត្រូវបានដាក់បង្កៃគ្រាប់បែកឲ្យផ្ទុះនៅលើអាកាស បន្ទាប់ពីវា បានហោះចេញពីទីក្រុងប៉ារីសប្រទេសបារាំង ឆ្ពោះទៅកាន់រដ្ឋធានីគែររបស់អេហ្ស៊ីប ហើយដែល ប្រទេសបារាំងនេះ ក៏ធ្លាប់ទទួលរងនូវអំពើភេរវកម្មជាច្រើនលើកមកហើយដែរ។</span></p>
<p><span style="color: #000000;">លោក Adel អ្នកនាំពាក្យអាកាសចរណ៍អេហ្ស៊ីប បានប្រាប់ស៊ីអិនអិននៅថ្ងៃសុក្រកន្លងទៅនេះថា «យើង សូមបញ្ជាក់ថាបំណែកដែលត្រូវបានរកឃើញនោះ មិនមែនជារបស់យន្តហោះដែលកំពុងបាត់ ដំណឹងនោះឡើយ ដូច្នេះការរុករកនៅតែកំពុងបន្ត»។</span></p>
<p><span style="color: #000000;">គួរបញ្ជាក់ថាយន្តហោះ EgyptAir Flight 804 ដែលជាប្រភេទAirbus A320 ដឹកមនុស្សសរុប ៦៦នាក់ បានបាត់ដំណឹងកាលពីថ្ងៃព្រហស្បតិ៍សប្តាហ៏មុន ដោយតំណាក់កាលដំបូង គេសង្ស័យថាវាអាចធ្លាក់ទៅក្នុងដែនសមុទ្រមេឌីទែរ៉ាណេ ក្បែរកោះមួយរបស់ប្រទេសក្រិក។ បច្ចុប្បន្នក្រុមរុករកដែលកំពុងបំពេញប្រតិបត្តិការស្វែងរកយន្តហោះ មានមកពីប្រទេសក្រិក អេហ្ស៊ីប និងបារាំង៕</span></p>
<p><span style="color: #000000;"><img src="http://cdn.images.dailystar.co.uk/dynamic/1/photos/197000/620x/egyptair-crash-516977.jpg" alt="" width="730" /></span></p>
<p><span style="color: #000000;"><img src="http://www.valuewalk.com/wp-content/uploads/2016/05/EgyptAir-MS804-Flight.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>