<p><strong><br /></strong></p>
<p>ការពេញចិត្ដ ឬជាប់ចិត្ដទៅលើរបស់អ្វីមួយដែលធ្វើឱ្យចិត្ដ និងគំនិតគិតឃើញថាល្អ ហើយស្រឡាញ់ដក់ជាប់នៅក្នុងដួងចិត្ដ ដោយមិនចង់ឱ្យរបស់ដែលខ្លួនស្រឡាញ់នោះបាត់បង់ឡើយ។ តែការស្រឡាញ់ប៉ុនប៉ងនូវអ្វីដែលខ្លួនស្រឡាញ់ គឺអ្នកខ្លះបានទទួល លទ្ធផលសមតាមសេចក្ដីប្រាថ្នា។ អ្នកខ្លះត្រូវទទួលបរាជ័យដូចជានៅក្នុងន័យរឿងស្នេហា ដោយមានសង្សារក្បត់ចិត្ដបោះបង់ចោល រីឯអ្នកខ្លះទៀតត្រូវមានស្វាមីមិនសមប្រកប វាយដំធ្វើបាបស្ទើររាល់ថ្ងៃ។</p>
<p><a class="thickbox" title="" href="/FileManager/Commons/2012/7/24/couple040610a5-24-07-2012--12-32-12.jpg"><img style="display: block; margin-left: auto; margin-right: auto;" src="/FileManager/Articles/mce/2012/7/24/couple040610a5-24-07-2012--12-32-12.jpg" alt="" /></a></p>
<p>ប៉ុន្ដែការខូចចិត្ដដូចខាងលើ មិនបានធ្វើឱ្យអ្នកទទួលនូវការ ឈឺចាប់ ចាត់ទុកជាមេរៀនជូរចត់ហើយរាងចាលទេ បែរជាសិក្សាមេរៀនដ៏ជូរចត់នេះម្ដងហើយម្ដងទៀតទៅវិញ។ នៅពេលដែលត្រូវ បានគេលួងលោម បណ្ដាលឱ្យចិត្ដខ្លួនឯងមិនរឹងប៉ឹងទៅជាអាណិតអាសូរគេ។ ដូច្នេះ កត្ដាដែលធ្វើឱ្យមាន<br />ចិត្ដទន់ជ្រាយគឺបណ្ដាលមកពីកត្ដាដូចតទៅ៖</p>
<p><strong>អបិយជំនឿ</strong> ៖ ខ្មែរយើងតែងតែចំណាំបែបជំនឿសាសនាថា មនុស្សប្រុសស្រីទាំងឡាយដែលកើតនៅថ្ងៃច័ន្ទ និងថ្ងៃពុធ គឺមានចិត្ដទន់។</p>
<p><strong>ផ្លូវចិត្ដ</strong> ៖ នារីម្នាក់ចេះតែគិតថា ខ្លួនឯងកើតមកជាកូនអ្នកក្រ រៀនក៏មិនបានខ្ពស់ ហើយឪពុកម្ដាយមានជម្ងឺជាទម្ងន់ទៀត តើធ្វើម្ដេចនឹងមានប្រាក់មកព្យាបាលជម្ងឺឪពុកម្ដាយ និងជួយជីវភាពគ្រួសារឱ្យបានធូរធារ។ ការគិតទាំងអស់នេះត្រូវបានជនដែលមានគំនិតខូចឆ្លៀតឱកាសមកលួងលោម ចង់យកទៅលក់។ ដោយជនអាក្រក់នោះពូកែនិយាយថា នឹងរកការងារឱ្យធ្វើហើយ ទទួលបានប្រាក់ច្រើនអាចមកជួយគ្រួសារ រហូតដល់ពង្វក់ចិត្ដនារីម្នាក់នេះដល់ទន់ចិត្ដ ជឿលើសម្ដីបោកប្រាស់គេ។</p>
<p><strong>លួងលោម</strong> ៖ គេសង្កេតឃើញថា នៅក្នុងគ្រួសារដែលមានអំពើហិង្សា ប្ដីវ៉ៃប្រពន្ធស្ទើររៀងរាល់ថ្ងៃ បែរជាមានកូន ច្រើនទៅវិញ។ នេះដោយតែប្ដីវ៉ៃប្រពន្ធហើយ មកលួងលោមប្រពន្ធវិញរាល់ពេលដែលវ៉ៃហើយ រួចប្រពន្ធចិត្ដទន់លើកលែងទោសឱ្យប្ដី ក៏បង្កើតបានជាកូនច្រើន(ខ្មែរយើងច្រើនហៅថា កូនមួយកន្ទេល)។</p>
<p><strong>គ្មានការពិចារណា</strong> ៖ កុមារអាចក្លាយជាឃាតករដោយមិនដឹងខ្លួន នៅពេលដែលមនុស្សធំមកលួងលោមឱ្យធ្វើអំពើមិនគប្បី ដោយសន្យាថានឹងឱ្យរបស់អ្វីមួយដែលកុមារពេញចិត្ដ។ ភាពលួងលោមនេះធ្វើឱ្យកុមារមិនបានគិតវែងឆ្ងាយដូចមនុស្សធំទេ បណ្ដាលឱ្យកុមារចិត្ដទន់ប្រព្រឹត្ដតាមបញ្ជាគេ។</p>
<p><strong>ការបង្ខិតបង្ខំ</strong> ៖ អ្នកខ្លះចិត្ដទន់ដោយសារការបង្ខិតបង្ខំ ជាឧទាហរណ៍ ដូចជាចៅហ្វាយនាយ និងកូនចៅ។ ការងារ លំបាកខ្លាំងដែលកូនចៅមិនចង់ធ្វើ បើសិនចៅហ្វាយប្រើឱ្យធ្វើកូនចៅត្រូវតែធ្វើទាំងមិនពេញចិត្ដ។</p>
<p><em><strong>ចិត្ដទន់ជ្រាយអាចបង្កឱ្យមានផលវិបាកជាច្រើន ៖</strong></em></p>
<ul>
<li>១. ងាយរងគ្រោះក្លាយជាឃាតករ</li>
<li>២. រស់នៅដោយគ្មានសេរីភាព</li>
<li>៣. ធ្វើឱ្យការរស់នៅមានការលំបាក</li>
<li>៤. ធ្វើឱ្យបាត់បង់ជីវិតជាដើម។<br /><br /></li>
</ul>
<p><strong><em>គួរធ្វើបែបណាដើម្បីដោះស្រាយបញ្ហានេះ?</em><br /></strong></p>
<p>តាមការស្រាវជ្រាវគេឃើញថា អ្នកដែលមានចិត្ដទន់ជ្រាយច្រើនគឺជាស្ដ្រី។ ដូចនេះ ដើម្បីចៀសវាងផលវិបាកទៅថ្ងៃ ក្រោយដោយសារមានចិត្ដទន់ជ្រាយ ស្ដ្រីត្រូវយល់ដឹងពីអត្ដចរិត និងចិត្ដខ្លួនឯងឱ្យបានច្បាស់ជាមុនសិន ទើបយល់ច្បាស់ពីអត្ដចរិត និងចិត្ដអ្នកដទៃជាក្រោយ។ ការធ្វើដូចនេះអាចជួយកាត់បន្ថយចិត្ដទន់ជ្រាយបាន៕</p>
<p style="text-align: right;">ដោយ ៖ សូរីយ៉ា<br />ប្រភព ៖ HC</p>