<p><span style="color: #000000;"><strong>ព័ត៌មានអន្តរជាតិ៖</strong> មេដឹកនាំកូរ៉េខាងជើង លោក គីម ជុងអ៊ុន បានអំពាវនាវឱ្យពន្លឿនការបញ្ចប់ការសាងសង់ សង្កាត់ថ្មីក្នុងទីក្រុងព្យុងយ៉ាង នៅមុនពេលខួបកំណើត នៃបិតាស្ថាបនិកកូរ៉េខាងជើង លោក គីម អ៊ីលស៊ុង នៅខែមេសា ខាងមុខនេះ។ នេះបើតាមសារព័ត៌មាន កូរ៉េខាងជើង KCNA ដកស្រង់ដោយទីភ្នាក់ងារសារព័ត៌មានយ៉ុនហាប់ នៅព្រឹកថ្ងៃព្រហស្បតិ៍ ទី១៦ ខែមីនា ឆ្នាំ២០១៧។</span></p>
<p><span style="color: #000000;">កូរ៉េខាងជើងកំពុងបង្កើនកិច្ចខិតខំប្រឹងប្រែងបញ្ចប់ការដ្ឋានសាងសង់សង្កាត់ថ្មីមួយ នៃផ្លូវ Ryomyong ឱ្យបានមុខថ្ងៃទី១៥ ខែមេសា ជាថ្ងៃខួបកំណើតលើកទី១០៥ នៃអតីតសពអគ្គមគ្គុទេសន៍កូរ៉េខាងជើង លោក គីម អ៊ីលស៊ុង ដែលជាជីតារបស់លោក គីម ជុងអ៊ុន។ យោងតាម KCNA លោក គីម ជុង អ៊ុន បានចុះទៅដល់ការដ្ឋានសាងសង់ដោយផ្ទាល់ កាលពីខែមករាកន្លងទៅ ដើម្បីតឿនឱ្យក្រុមកម្មករពន្លឿនការងាររបស់ពួកគេ។ <strong>«នៅសល់ជាងតែ ៣០ថ្ងៃទៀតប៉ុណ្ណោះ ការងារសាងសង់សង្កាត់ថ្មី Ryomyong ត្រូវបញ្ចប់ឱ្យបានមុនទិវាព្រះអាទិត្យ (ថ្ងៃខួបកំណើតលោក គីម អ៊ីលស៊ុង)»</strong>។ នេះបើតាមសម្ដីលោក គីម ជុងអ៊ុន ចេញផ្សាយដោយ KCNA។</span></p>
<p><span style="color: #000000;">គួរបញ្ជាក់ថាកាលពីដំបូងឡើយ លោក គីម ជុងអ៊ុន បានបញ្ជាឱ្យបញ្ចប់ការងារសាងសង់សង្កាត់ថ្មីនេះឱ្យបានមុនចុងឆ្នាំ២០១៦ ក៏ប៉ុន្តែដោយសារតែ គ្រោះទឹកជំនន់ ទើបគំរោងត្រូវពន្យាពេល។ ដោយឡែកបើតាមគេហទំព័រកូរ៉េខាងជើង Minjok Tongshin មានមូលដ្ឋាននៅសហរដ្ឋអាមេរិក សង្កាត់ថ្មី Ryomyong មានលំនៅដ្ឋាន ៤,៨០០ខ្នង ហើយគំរោងនេះត្រូវចំណាយប្រាក់ជាង២.៨លានដុល្លារ ជាការបង្ហាញនូវសមិទ្ធផលថ្មីរបស់របបលោក គីម ជុងអ៊ុន នៅថ្ងៃខួបជីតា ដែលបានទទួលមរណភាពកាលពីឆ្នាំ១៩៩៤៕</span></p>
<p><span style="color: #000000;"><a class="thickbox" title="" href="/FileManager/Commons/2017/3/16/30a-16-03-2017--14-57-18.jpg"><img src="/FileManager/Articles/mce/2017/3/16/30a-16-03-2017--14-57-18.jpg" alt="" /></a><br /><br /></span></p>
<p style="text-align: right;"><span style="color: #000000;">ប្រភព ៖ យ៉ុនហាប់</span></p>