<div>
<p><span style="color: #000000;"><strong>(ភ្នំពេញ)៖</strong> ផលិតកម្ម BKS Production បានរៀបចំពិធីក្រុងពាលី ថតរឿងថ្មីរបស់ខ្លួនមួយទៀត នៅព្រឹកថ្ងៃទី១១ ខែកុម្ភៈ ឆ្នាំ២០១៦នេះ ស្ថិតក្នុងភូមិគ្រឹះដ៏ស្កឹមស្កៃ ក្នុងបុរីវិមានភ្នំពេញថ្មី ផ្លូវលេខ ៥៩៨ សង្កាត់គីឡូម៉ែត្រលេខ៦ ខណ្ឌឫស្សីកែវ ដោយរឿងថ្មីនេះ មានចំណងជើងថា«អាស៊ុយទ្រីស្មោះស្នេហ៍» ជាប្រភេទរឿងមនោសញ្ចេតនា ស្នេហា បែកកំប្លុកកំប្លែង និងមានលាយឈុតឆាកខ្មោចខ្លះៗ ក្រោមការនិពន្ធ និងដឹកនាំសម្ដែងដោយកូនខ្មែរពិតៗ ។ អ្វីដែលពិសេសក្នុងរឿងថ្មីនេះ គឺចាងហ្វាងផលិតកម្មវ័យក្មេង លោក ឈុន សុវណ្ណភក្តី ដែលជាតារាសម្ដែងមានឈ្មោះល្បីម្នាក់ផងនោះ នឹងចូលរួមសម្ដែងជាតួឯកប្រុស ក្នុងរឿងរបស់ខ្លួនទៀតផង។</span></p>
<p><span style="color: #000000;">ពិធីក្រុងពាលី នាព្រឹកមិញនេះ គេសង្កេតឃើញ មានតារាសម្ដែង តារាកំប្លែង ក្នុងរឿង ចូលរួមជាច្រើននាក់ រួមទាំងក្រុមការងារថត និងអ្នកសារព័ត៌មានជាច្រើននាក់ផងដែរ ។ លោក ឈុន សុវណ្ណភក្តី ចាងហ្វាងផលិតកម្ម BKS Production និងជាតួឯកក្នុងរឿងនេះ បានថ្លែងឲ្យដឹងថា «រឿង អាស៊ុយទ្រីស្មោះស្នេហ៍ ជាភាពយន្តស្នាដៃថ្មីទី២ របស់ផលិតកម្ម ខណៈរឿងទី១មានចំណងជើងថា ដៃគូកម្ចាត់ខ្មោច ត្រូវបានថតចប់រួចរាល់ និងត្រៀមបញ្ចាំងក្នុងពេលឆាប់នេះ ហើយរឿងនេះនឹងគ្រោងចំណាយទុនថត អស់ច្រើនជាងរឿងមុន ព្រោះឧបករណ៍សុទ្ធសឹងតែថ្មីៗទើបនឹងទិញ ហើយការពង្រឹងលើគុណភាពរឿង ក៏ត្រូវបានយកចិត្តទុកដាក់ផងដែរ»។</span></p>
<p><span style="color: #000000;">«ខ្ញុំគិតថា រឿងនេះ (អាស៊ុយទ្រីស្មោះស្នេហ៍) នឹងត្រូវចំណាយអស់ច្រើនជាងរឿង ដៃគូកម្ចាត់ខ្មោច ព្រោះគ្រាន់តែឧបករណ៍ ដែលខ្ញុំទើបតែទិញ ដើម្បីត្រៀមថតក្នុងរឿងនេះ គឺអស់ជាង២ម៉ឺនដុល្លារទៅហើយ ចុះទម្រាំចំណាយលើតួសម្ដែង ក្រុមការងារថត និងសេវាកម្មផ្សេងៗទៀត គឺខ្ញុំដឹងថា អស់ច្រើន..» លោក ឈុន សុវណ្ណភក្តី បញ្ជាក់បន្ថែម ។</span></p>
<p><span style="color: #000000;">នៅពេលសួរថា តើលោកអាចបញ្ជាក់បានទេថា លោកជាចាងហ្វាងផលិតកម្ម ហើយពេលមកសម្ដែងជាតួឯក ដោយខ្លួនឯងបែបនេះ តើអាចទទួលការចាប់អារម្មណ៍ឬទេ ហើយអាចមានបញ្ហាអ្វីខ្លះកើតឡើង? លោក ឈុន សុវណ្ណភក្តី បានបញ្ជាក់ថា លោកគីតថា គ្មានបញ្ហាអ្វីកើតឡើងនោះទេ ព្រោះទី១មុននឹងលោកបើកផលិតកម្ម ហើយដាក់ចិត្តដាក់កាយ ចូលប្រឡូកក្នុងវិស័យសិល្បៈ គឺដោយសារតែលោកស្រឡាញ់សិល្បៈ ចង់ធ្វើជាតារាចម្រៀង និងតារាសម្ដែងដ៏ល្បីម្នាក់ ត្រូវបានទស្សនិកជនទទួលស្គាល់ ហើយទី២លោកចង់បញ្ចេញសមត្ថភាពខ្លួនឯង ដើម្បីឲ្យដឹងថា តើខ្លួនឯងមានទេពកោសល្យ និងសមត្ថភាពកម្រិតណា ?</span></p>
<p><span style="color: #000000;">ទោះជាយ៉ាងណា ចាងហ្វាងវ័យក្មេងរូបនេះ បន្ថែមថា រឿង «អាស៊ុយទ្រីស្មោះស្នេហ៍» មានចំណុចទាក់ទាញ ឈុតឆាកពិសេសៗ បែបកំប្លែង និងស្នេហាមនោសញ្ចេតនា ជាច្រើនទៀត ដែលអ្នកទស្សនា មិនធ្លាប់បានជួបប្រទះពីមុនមក ។ លើសពីនេះ រឿង «អាស៊ុយទ្រីស្មោះស្នេហ៍» ក៏បានឆ្លុះបញ្ចាំងពីខ្សែជីវិតពិត របស់ចាងហ្វាងវ័យក្មេងរូបនេះផងដែរ ដែលលោកជាអ្នកនិពន្ធបទច្រៀង និងជាអ្នកចម្រៀងទៀតផង។</span></p>
<p><span style="color: #000000;">លោកបញ្ជាក់ថា ដើម្បីពង្រឹងគុណភាពភាពយន្តឲ្យកាន់តែល្អ គឺលោកផ្ដោតសំខាន់លើ ការកាត់ត និងការលួចប្លង់ថត ។ ពីមុនប្លង់មានតែមនុស្ស៣ទៅ៤នាក់ប៉ុណ្ណោះ ប៉ុន្តែប្លង់របស់លោកនៅពេលនេះ បើថាមនុស្ស៤០នាក់ គឺលោកចាប់យកទាំង៤០នាក់តែម្ដង ។ ម្យ៉ាងទៀត សាច់រឿង និងការរើសតួសម្ដែង ទីតាំងថត ក៏ជាចំណុចសំខាន់ ដើម្បីឲ្យផ្ទៃរឿងទាំងមូល មានគុណភាពល្អ មានការទាក់ទាញផងដែរ ។</span></p>
<p><span style="color: #000000;">សូមបញ្ជាក់ថា រឿង «អាស៊ុយទ្រីស្មោះស្នេហ៍» មានការចូលរួមសម្ដែងដោយកញ្ញា គីម ច័ន្ទបូរមី ហៅម៉ីម៉ី ជាតួឯកស្រី និងតារាល្បីជាច្រើនដួងទៀត រួមមាន នាយសង់ស៊ីស, លោក ទេព រិន្ទដារ៉ូ, អ្នកនាង ប៉ែន សុផានី, មីង ប្រជ្រុយ, ស្រីរ័ត្ន, នាយកណ្ដុរ, នាយពាង, លោក ម៉ាដូណា ,នាង ប៉េងប៉ោង និងតារាកិត្តិយសជាច្រើនទៀត ដែលសរុបប្រមាណជិត១០០នាក់៕</span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xpl1/t31.0-8/12672016_1556732721307760_3414903243424766988_o.jpg" alt="" width="730" /></span></p>
<p style="text-align: center;"><span style="color: #000000;"><img src="https://fbcdn-sphotos-g-a.akamaihd.net/hphotos-ak-xfl1/t31.0-8/12440671_1556732717974427_6501462618492039845_o.jpg" alt="" width="730" /></span></p>
<p style="text-align: center;"><span style="color: #000000;"><img src="https://fbcdn-sphotos-b-a.akamaihd.net/hphotos-ak-xfp1/v/t1.0-9/12670224_1556732714641094_1597794511811549723_n.jpg?oh=09d942848979103c537362155f8432c9&oe=5769F5E2&__gda__=1466417330_5174cb1abd7118ac1466ed1565ebdbab" alt="" width="730" /></span></p>
<p style="text-align: center;"><span style="color: #000000;"><img src="https://fbcdn-sphotos-a-a.akamaihd.net/hphotos-ak-xpt1/v/t1.0-9/12744178_1556732747974424_7106953577058238939_n.jpg?oh=fffe70c611de68f668a4edfb7ac8b399&oe=573836DF&__gda__=1462161247_f47b09b9110b7f6261159669b6b64d40" alt="" width="730" /></span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xlf1/t31.0-8/12711054_1556732794641086_72914194438808243_o.jpg" alt="" width="730" /></span></p>
<p style="text-align: center;"><span style="color: #000000;"><img src="https://fbcdn-sphotos-h-a.akamaihd.net/hphotos-ak-xaf1/t31.0-8/12694803_1556732797974419_1514110400267212474_o.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
</div>