(ភ្នំពេញ)៖ តារាសម្តែងប្រុសរូបសង្ហា សម្បូរសាច់ដុំលោក ចន អេឡិចហ្សូរ៉ា កាលពីថ្ងៃទី២៦ ខែតុលា ឆ្នាំ២០១៦ម្សិលមិញ បានបង្ហោះរូបថតចំនួន៣សន្លឹក ភ្ជាប់ជាមួយទិដ្ឋភាពនៃការចូលរួមគោរព ព្រះវិញ្ញាណក្ខន្ធស្តេចថៃ ព្រះចៅ ភូមិប៊ុល អាប់ឌុលយ៉ាដេត ពីទឹកដីប្រទេសថៃ ព្រមជាមួយការបង្ហាញនូវទឹកចិត្ដ សោកស្ដាយ ជាមួយប្រជាពលរដ្ឋថៃ ដែលបានបាត់បង់ព្រះមហាក្សត្រ ដ៏មានឥទ្ធិពលរូបនេះ។
ភ្ជាប់ជាមួយរូបភាព បង្ហាញឲ្យឃើញពីការចូលរួម គោរពព្រះវិញ្ញាណក្ខន្ធស្តេចថៃ ភូមិប៊ុល អាប់ឌុលយ៉ាដេត នេះដែរ តារាសម្តែងតួឯកប្រុស ក្នុងភាពយន្តរឿង «ទេសចរណ៍ឋាននរក» លោក ចន អេឡិចហ្សូរ៉ា ក៏បានសរសេរថា «ករុណាខ្ញុំសូមចូលរួម រំលែកមហាទុក្ខរបស់បងប្អូនជនជាតិថៃ ទូទាំងប្រទេស នៃការចូលព្រះទិវង្គត ព្រះវិញ្ញាណក្ខន្ធព្រះមហាក្សត្រថៃ ភូមិប៊ុល អាប់ឌុលយ៉ាដេត!»។
បន្ថែមពីលើនេះ តារាសម្តែងលោក ចន អេឡិចហ្សូរ៉ា បានថ្លែងប្រាប់ឲ្យដឹង តាមរយៈសាអេឡិចត្រូនិច ពីប្រទេសថៃថា «គាប់ជូនកាលពីថ្ងៃទី២៥ ខែតុលាកន្លងមកនេះ លោកបានធ្វើដំណើរទៅប្រទេសថៃ ដើម្បីនាំឪពុកទៅពិត្យសុខភាព នៅទីនោះ ហើយក៏ឆ្លាតឱកាសទំនេរនាំមិត្តភក្តិ ទៅចូលរួមគោរពព្រះវិញ្ញាណក្ខន្ធ ព្រះមហាក្សត្រថៃ ភូមិប៊ុល អាប់ឌុលយ៉ាដេតតែម្តង ក្នុងនាមជាប្រជាជន រស់នៅភូមិផងរបងជាមួយគ្នា!»។
តារាប្រុសលោក ចន អេឡិចហ្សូរ៉ា បានបន្តថា មិនថា ព្រះមហាក្សត្រយើង ឬព្រះមហាក្សត្រគេទេ គឺយើងមានក្ដីស្រឡាញ់ និងសោកស្តាយដូចគ្នា នៅពេលដែលបាត់បង់ទៅ បែបនេះនោះ។ ដូច្នេះក្នុងនាមជា ប្រជាពលរដ្ឋក្បែរខាងគ្នានោះ គឺយើងត្រូវតែចូលរួមរំលែកទុក្ខ គ្នាទៅវិញទៅមក វាជារឿងត្រឹមត្រូវ៕
ផ្តល់សិទ្ធដោយ ៖ ខ្មែរថកឃីង