ឆាក្ដៅអន្ទង់ បែបនេះធានាថាឆ្ងាញ់!!!

យល់ដឹង

ឆាក្ដៅអន្ទង់ បែបនេះធានាថាឆ្ងាញ់!!!

11:12 AM 16.07.2018
Print Email

គ្រឿងផ្សំ

អន្ទង់ ៣ខាំ
ខ្ទឹមស ១មើម
ស្លឹកក្រូចសើច ១សន្លឹក
ខ្ជាយ ១ចំណិត
រំដេង ១ចំណិត
គល់ស្លឹកគ្រៃ ២គល់
ម្ទេស ១គ្រាប់
ប៊ីចេង កន្លះស្លាបព្រាកាហ្វេ
ទឹកត្រី កន្លះស្លាបព្រាបបរ
ខ្លាញ់ ២ស្លាបព្រាបបរ
ស្ករ កន្លះស្លាបព្រាកាហ្វេ
ម្រះព្រៅ ទៅតាមការចូលចិត្ដ
សណ្ដែកដីឆ្អិន ១ស្លាបព្រាបាយ

ការរៀបចំគ្រឿងផ្សំ

សូមយកអន្ទង់មកលាងជាមួយទឹកអំបិលឱ្យអស់ក្អែលខ្មៅៗឱ្យស្អាត បន្ទាប់មកត្រូវវះយកពោះចេញ ហើយកាត់ជាកង់ៗល្មម។ បន្ទាប់មកត្រូវយកទៅបំពងជាមួយនឹងខ្លាញ់ឱ្យឆ្អិនល្មម មិនត្រូវឱ្យបែកសាច់អន្ទង់នោះទេ បន្ទាប់មកត្រូវដួសទុកដោយឡែក។
ខ្ទឹមសចែកជាពីយកទៅចិញ្ច្រាំកុំឱ្យម៉ដ្ដពេកមួយចំហៀង និងយកទៅបុកជាមួយគ្រឿងមួយចំហៀង
ម្ទេសហាន់ជាចំណិតវែងៗ
សណ្ដែកដីយកទៅបុកកុំឱ្យម៉ដ្ដពេក
ម្រះព្រៅបេះយកតែស្លឹកហើយយកទៅលាងទឹកឱ្យស្អាត
ស្លឹកក្រូចសើច រំដេង ខ្ជាយ គល់ស្លឹកគ្រៃលាងទឹកឱ្យស្អាតយកទៅហាន់ស្ដើងៗ ហើយបុកចូលគ្នាឱ្យម៉ដ្ដ បន្ទាប់មកដាក់ខ្ទឹមសចូលហើយបុកចូលគ្នាឱ្យម៉ដ្ដម្ដងទៀត។

របៀបធ្វើ

ជាដំបូងដាក់ខ្ទះឱ្យក្ដៅហើយដាក់ខ្លាញ់ឱ្យក្ដៅ បន្ទាប់មកដាក់ខ្ទឹមសដែលចិញ្ច្រាំ និងម្ទេសចូលឆាឱ្យឡើងជើងអង្ក្រងល្មម បន្ទាប់មកដាក់គ្រឿងបុកចូលឆាឱ្យឈ្ងុយ ហើយដាក់អន្ទង់ចូល។ បន្ទាប់មកត្រូវដាក់ស្ករស ទឹកត្រី និងប៊ីចេងរួចភ្លក់មើលទើបដាក់ សណ្ដែកដីរួមទាំងម្រះព្រៅចូល រួចដួសដាក់ចានជាការស្រេច។

បញ្ជាក់ ៖ ម្ហូបនេះអាចទទួលទានបានជាមួយបាយស ឬអាចធ្វើជាគ្រឿងក្លែមក៏បាន ៕