(ភ្នំពេញ)៖ តារាសម្ដែងមានសម្រស់ផូរផង់ គួរជាទីទាក់ទាញចិត្តក្រុមបុរសៗសម្បូរទ្រព្យ ចូលចិត្តយកលុយដុល្លាររាយអន្ទាក់ស្នេហ៍ កញ្ញា គីម ច័ន្ទបូរមី ហៅម៉ីម៉ី បានបដិសេធយ៉ាងដាច់អហង្ការថា នាងមិនប្រាថ្នារស់នៅក្រោមទ្រព្យ និងការធានាចិញ្ចឹមពីសំណាក់ បុរសណាម្នាក់ចង់ល្បងស្នេហ៍នាងឡើយ ព្រោះនាងមិនចង់បានស្នេហាបែបនេះ ហើយគ្រួសារក៏មានជីវភាពធូរធា សមល្មមនឹងអាចរស់នៅបានដោយស្រួលដែរ។
ការថ្លែងបែបនេះ គឺស្របពេលដែលស្រីស្រស់ គីម ច័ន្ទបូរមី ទទួលបានតំណែងជាតួឯក ក្នុងរឿងថ្មី មានចំណងជើងថា« អាស៊ុយទ្រីស្មោះស្នេហ៍» របស់ផលិតកម្ម BKS Production កាលពីថ្ងៃទី១១ ខែកុម្ភៈ ឆ្នាំ២០១៦ ក្នុងពិធីក្រុងពាលីថតរឿងថ្មីនេះ ខណៈដែលនាងជាតារាសម្ដែងម្នាក់ កំពុងតែមានទីផ្សារសិល្បៈល្អ ក្រោយចូលប្រឡូកបាន រយៈពេលប្រមាណ ជាង១ឆ្នាំ ។
កញ្ញា គីម ច័ន្ទបូរមី បាននិយាយថា ការចូលប្រឡូកក្នុងសិល្បៈ តែងតែមានព័ត៌មានលេចឮពីមាត់មួយ ទៅមាត់មួយ មិនអត់នោះទេ តែអ្វីដែលសំខាន់បំផុត គឺយើងមិនបានធ្វើ ដូច្នេះយើងអត់ខ្លាចនោះឡើយ។ ជាពិសេសចំពោះរូបនាងផ្ទាល់ ក៏មិនចង់រស់នៅក្នុងស្ថានភាព មានគេតាមស្រឡាញ់ ចង់យកចិញ្ចឹម និងរស់ក្រោមប្រាក់របស់អ្នកមាននោះដែរ ព្រោះនាងអះអាងថា គ្រួសាររបស់នាងមានជីវភាពសមរម្យ គួរឲ្យនាងទទួលយកបានហើយ មិនបាច់ដើរលើផ្លូវមួយនេះ នាំតែមានវិប្បដិសារីនោះទេ ។
គីម ច័ន្ទបូរមី និយាយ« ចា៎..បង អត់ទេ ខ្ញុំមិនទាន់គិតរឿងស្នេហាអ្វីទេ មានអ្នកស្រឡាញ់ឬគ្មានក៏ខ្ញុំអត់ដឹងដែរ ខ្ញុំធ្វើយ៉ាងណាការងារសិល្បៈរីកចម្រើន និងមានឈ្មោះល្បីជាងនេះសិន ។ ខ្ញុំក៏មិនចង់រស់នៅក្រោម ការឧបត្ថម្ភរបស់នរណាដែរ ប៉ាម៉ាក់ខ្ញុំគាត់មានជីវភាពធូរធា ខ្ញុំអាចទទួលយកបានហើយ..!» ។
ងាកមកមើលការងារសិល្បៈ របស់ស្រីស្រស់ គីម ច័ន្ទបូរមី វិញ ត្រូវបាននាងបញ្ជាក់ថា កំពុងតែមមាញឹកនឹងការសម្ដែងគួរសម ព្រោះមានគេទាក់ទងឲ្យសម្ដែងជាហូរហែ ។ សម្រាប់នាងមិនប្រកាន់ថា ទាល់តែបានតំណែងជាតួឯក ទើបសម្ដែងនោះទេ ពោលទោះបីជាអ្នកដឹកនាំសម្ដែង ឬចាងហ្វាងផលិតកម្ម តម្រូវឲ្យនាងសម្ដែងជាតួរង ឬតួអ្វីក៏បាន នាងមិនប្រកាន់ ឬមានជំងឺតួឯកនោះឡើយ៕
ផ្តល់សិទ្ធដោយ ៖ ហ្វ្រេសញូវអាស៊ី