CamNews

Samsung បានធ្វើការផ្លាស់ប្តូរការកំណត់សំគាល់ សម្រាប់ Galaxy Note 7 ថ្មី ថាជាម៉ូដែលមាន​សុវត្ថិភាព ដោយអ្នកប្រើប្រាស់ មិនចាំបាច់ធ្វើការត្រួតពិនិត្យលើប្រអប់ ឬក៏ឆែកលេខ IMEI នោះទេ។

Samsung កំពុងតែធ្វើការញាប់ដៃញាប់ជើង ក្នុងការរៀបចំស្មាតហ្វូន Note7 ថ្មីៗរបស់ខ្លួន ដើម្បីផ្លាស់​ប្តូរដល់អតិថិជន នៅទូទាំងពិភពលោក។ ដើម្បីជាជំនួយក្នុងការកំណត់សំគាល់ បណ្តា Galaxy Note 7 ថ្មីៗ ដែលធានាថាជាម៉ូដែលមានសុវត្ថិភាព Samsung បានប្រើប្រាស់សញ្ញាសំគាល់ជាអក្សរ “S” នៅ​លើ​ប្រអប់។

ជាក់ស្តែង សញ្ញាសំគាល់នេះ វារាងតូចបន្តិច ហើយអាចនឹងមិនគ្រប់គ្រាន់ដើម្បីធ្វើការកំណត់សំគាល់​តាមរយះនេះ Samsung ក៏បានបន្ថែមធ្វើការផ្លាស់ប្តូរទាំងពណ៌នៃ អាយខុន (icon) រូបថ្ម ដែលបង្ហាញ នៅលើអេក្រង់ Note​ 7 ថ្មីទៀតផង។

icon រូបថ្មពណ៌ស គឺជាម៉ូដែលមានបញ្ហាថ្ម, បើមានពណ៌បៃតង វានឹងជាម៉ូដែលមានសុវត្ថិភាព

ជាក់ស្តែង ពេលអ្នកសម្លឹងមើលអាយខុនរូបថ្ម នៅជ្រុងខាងលើ និងខាងស្តាំនៃអេក្រង់ Note 7 ថ្មី នោះអ្នកនឹងបានឃើញ វាមានពណ៌បៃតងវិញ ជំនួសឲ្យពណ៌ស ដូចកាលពីម៉ូដែលមុន។ តាមរយះ​នេះ អ្នកប្រើប្រាស់អាចកំណត់សំគាល់បានថា Note 7 របស់អ្នកជាម៉ូដែលមានសុវត្ថិភាពភ្លាមៗ ដោយ មិនបាច់មើលទៅលើប្រអប់ (អាចមានហានិភ័យពីការប្តូរប្រអប់ ពីសំណាក់ជនខិលខូច ដែលមិនមែន​ពី​ខាងក្រុមហ៊ុន) ឬមិនចាំ​បាច់ឆែកលេខ IMEI នោះទេ។

ដូច្នេះ អ្នកប្រើប្រាស់ Note 7 ថ្មី គ្រាន់តែសម្លឹងមើលទៅលើរូបអាយខុនថ្ម ដែលមានពណ៌បៃតង​ នោះអ្នកអាចស្ងប់ចិត្តបានហើយ។ បើសិនជារូបថ្មនោះ មានពណ៌ស អ្នកត្រូវប្រុងប្រយ័ត្នបន្តិច ព្រោះវា​ជាម៉ូដែលមុន ដែលមានបញ្ហាថ្ម និងអាចផ្ទុះបាន។

យោងតាម Samsung Cambodia ក្រុមហ៊ុននឹងធ្វើការផ្លាស់ប្តូរ Galaxy Note 7 ម៉ូដែលថ្មីមាន​សុវត្ថិភាព​ចាប់ពីថ្ងៃទី ០៥ ខែតុលា ដល់ថ្ងៃទី១២ ខែតុលា ឆ្នាំ២០១៦​ ខាងមុននេះ សម្រាប់អ្នកដែលបានមក​ធ្វើកា​រចុះឈ្មោះ​ប្តូរយក Note 7 ថ្មី​ ពីថ្ងៃទី១២ ខែកញ្ញា ដល់ថ្ងៃ២៤ ខែកញ្ញា ឆ្នាំ២០១៦៕

ប្រែសម្រួល៖ មង្គល
ប្រភព៖ Genk